الإجازات مش بس وقت للراحة والتسلية، لكنها فرصة ذهبية لتجديد نشاط طفلك العقلي، ولازم تدربي أولادك على فكرة ان لو المدرسة أجازة فالعقل مينفعش ياخد إجازة، لكن للأسف كتير من الأهالي بيسيبوا أولادهم للموبايلات و التابلت كوسيلة تسلية سهلة وسريعة، لكن ده خطر جدًا على عقل الطفل، لأنه بيحفز إفراز “الدوبامين السهل” في المخ، وهو المادة اللي بتتفرز لما الطفل يحس بالمتعة من حاجة سريعة وسهلة زي الألعاب الإلكترونية أو مشاهدة الفيديوهات.
المشكلة إن المخ لما بيتعود على الإفراز السهل للدوبامين، ده بيخلي الطفل يعتمد على المتعة السريعة اللي مش محتاجة مجهود ذهني، وبالتالى بيكون صعب عليه بعد كده يركز أو يبذل مجهود عقلي في المدرسة أو في الأنشطة التعليمية.
عشان كده لازم تستبدلي الموبايلات كوسيلة تسلية أساسية بالألعاب العقلية اللي تغذي عقل طفلك في فترة الإجازة، و دي كانت الفكرة الرئيسية لبوفيه ألعاب العقل و هو عبارة عن بوفيه ألعاب مليان بالاختيارات المختلفة، هدفه توفير بدائل ممتعة وذكية لتنشيط عقل طفلك و تنمية ذكاؤه و تطوير شخصيته في الإجازة بدل ما يقضي اليوم كله قدام الشاشات
أولادك يقدروا يختاروا من البوفيه براحتهم الألعاب اللي تغذي عقولهم، زي ما بيختاروا من بوفيه الأكل المأكولات اللي تغذي جسمهم الألعاب دي مش مجرد تسلية، دي وسيلة قوية جدًا لتدريب العقل على التفكير، التحليل، والاستنتاج، و بتحفز قدرات الطفل بشكل طبيعي وممتع في نفس الوقت
ليه بوفيه ألعاب العقل مهم في الإجازة؟
الإجازة غالباً بتكون فترة الطفل فيها بيبعد عن الأنشطة التعليمية تمامًا، وده غلط كبير. إحنا محتاجين نحافظ على نشاط العقل بشكل مستمر، حتى لو كان بطريقة مرحة وخفيفة زي الألعاب العقلية. الطفل محتاج يحس إنه لسه بيفكر، بيحل، وبيتعلم، لكن بأسلوب غير تقليدي
الألعاب العقلية بتساعد الطفل في حاجات كتير زي:
1.تنمية المهارات المعرفية والتفكير المنطقي و النقدي: فيه ألعاب بتخلي الطفل يفكر بطريقة منظمة ويحلل كل خطوة
2. تحفيز الاسترخاء الإبداع: الألعاب من النوع ده مهمة جداً لأنها بتنمي خيال الطفل وبتساعده يعبر عن نفسه
3.تعزيز الذكاء العاطفي و وضع الاستراتيجيات: و الألعاب دي ليها دور كبير في تكوين و تطوير شخصية طفلك
4.تعزيز الروابط الاجتماعية: من خلال الألعاب اللي بتجمع العيلة و بتحفز على المشاركة
تقدري تنفذي فكرة بوفيه ألعاب العقل لطفلك في البيت بسهولة من خلال تحميل كتيب بوفيه ألعاب عقلية و ألعاب لوحية للتنمية الشخصية، الكتاب بيقدملك 50 لعبة عقلية و بيوضح أهمية كل لعبة
تقدري تحملي الكتاب من هنا
https://bit.ly/3BHzqXT
من خلال الألعاب دي، عقل الطفل بيكون في حالة نشاط دائم، وده بيأهله للرجوع للمدرسة بعد أي إجازة وهو مركز، وحاسس بقدرته على التفكير والتحليل.
و ده مش معناه إن الموبايل ممنوع تمامًا، لكن لازم يكون استخدامه محدود. ساعتين في آخر اليوم ممكن يكونوا كافيين للتسلية بالموبايل. أما باقي اليوم، لازم الطفل يكون مشغول في أنشطة بتنمي عقله، والألعاب العقلية هنا بتكون الحل الأمثل.